Algemein
in 1999
in 2000
Svenska
ROK
Hollandse
ROK
ROK in 2000:
Remunj
Ònger
Kameraas
ROK in 1999:
Remunjs
Olympies
Kommitee
't Olympies Journal
1500 keer gedrökt en oetgedeilt. Hiej is de tekst. Foto's drökke
veer allein op pepier, om de koste te drökke...|
Pries van 't Journal: eine Euro of eine Gölje of eine Pils veur alle leje vanne riddaksie |
Gezetnaam gesjponsord door kefee Le Journal oftewaal kefee ‘t Zjwetskammezoal aan ‘t Sjtasieplein 17a |
Riddaksie: de baovebuurmanne, de ongerbuurmanne, dokteranges KP, de halve waard van Leeve en inzjenjäör Prairy Fire B. |
Remunj krieg
Olympiese Wintjer
Sjpele in 2011!
Veer danke dr. J.C.P. Kats veur 't Remunjs waordebook!
Dees oetgave bevatj gesjponserde ongerdeile en moog doarom waere verväölvuldig.
‘t Remunjs Olympies Kommitee (ROK) kint geer ongersjteune mit göljes op raekening 11.11.11.11 biej oos bank.
Troewens, veur fotoos en grafiese zeiver mot geer toch ech nao d'n optoch kome en 't Olympiese Journal op pepier haole!
IN ‘T JOURNAL:
Leje van ‘t Remunjs Olympies Kommitee
Olympiese begreuting
Wo is waat? De Olympiese fasiliteite
't lètste Olympies nuujts
Olympiese sjponsore
't Olympies program
Demonsjtrasie Sjporte
Leje van ‘t Remunjs Olympies Kommitee
De Veurzitter: Bacchus Jan 1Eine veurzitter mót eine gewichtige persoon zeen, en dèt is d'r! As veurzitter zal hae zien ganse gewich inne sjaol ligke; hae mót ónger de Olympies Wintjer Spele veur oze Prins/Keuning Willem-Alexander zitte óm te verkómme dèt dae euveral ‘t veldj of ‘t ies op löp.
De Besjermheer: Sjportwethajer Ben Harbers
Eine besjermheer mót kinne besjerme èn eine heer zeen. Oos keus mós waal valle op deze èchte judoka èn sjportbobo! Zien belangriekste taak is ‘t besjerme van de leje van ‘t Remunjs Olympies Kommitee taege de IOC-leje die veer neet höbbe kinne ómkoupe. Eine van die kump oet Hollandj en duit ouch aan judo. Gelökkig kin Ben zó'n formaat aan; kiek mer op de foto wie hae mit Nol Hofman sjmiet! (Foto mit dank aan ‘t Träöternuujts/de Trompetter) Fotoos allein op pepier!
De Dirrektäör: Winst onbekind te blieve
Es post 2 op de begreuting vernamelik zien taak waas, moog zien vrouw neet weite dèt hae de dirrektäör is. En die geldjwölf vanne fiscus zeuke ‘m ouch! Troewens, in taegesjtèlling toet die ammeteurs van Salt Lake City, hoof oze dirrektäör neet te vertrekke as alles oetlek!
De Maskotte: Sint Kersjtoffel
Omdet veer ‘m höbbe ómgesjmolte (om de begreuting sjloetend te kriege) zólle de Olympiese Wintjer Sjpele van Remunj ‘t zónger maskotte mótte doon. Alternatieve maskotte-iedees kint geer netuurelik biej ‘t Remunjs Olympies Kommitee kwiet. Safy Products oppe Willem 2 singel 2b, zal veur de ‘merchandizing' zorge en daomit ein forse biejdrage aan de begreuting levere. Troewens, die lévere ouch ein forse biejdrage aan ós Olympiese leed, kiek mer op bladzeij 6!
Ere Leje:
Prins Rens I
Remunj mót aope sjtaon veur alle bezeukers van de Olympiese Wintjer Sjpele. En waem haet dees daag de sjleutel vanne sjtad? Juist!
Prins/Keuning Willem-Alexander Noe hae neet veur ‘t IOC wirk, kin d'r biej ós mit doon!
Al oos Sjponsore!
Veur eder biedrage aan oos sjloetende begreuting! Geer vinjt ze op bladzeij 7!
Olympiese begreuting
Op oos begreuting vinjt geer alle koste die veer veur de Olympiese Wintjer Sjpele höbbe gemaak. Om de zaak te financiere, höbbe veer ‘t beeld van Sint Kersjtoffel gesjmolte en gebroek. Omdèt dèt neet genog waas, höbbe veer ouch nog sjponsore mótte vinje. Die vinjt geer dus euveral ónger de Olympies Wintjer Spele en in dit Journal.| Göljes | Kostepost |
| 1.800.000,- | vergaderkoste mit leje van ‘t internationaal kommitee (IOC) |
| 8.000.000,- | noa besjpraekinge op de Riekswaeg met leje van ‘t internationaal kommitee |
| 650.000,- | nuuje waage (ferrari) veur de veurzitter van ‘t internationaal kommitee |
| 2.500.000,- | antieke beugelböl van Braam veur alle euverige leje van ‘t IOC |
| 4.000.000,- | sjoon sjlókreize nao plaetskes diej gaar nieks mit wintjer te doon höbbe (mer waal mit sjpele), gesjponsord door Star Travel oet Haele! |
| 300.000,- | parkeergeldj en boetes in Remunj |
| 750.000,- | get te aete veur ‘t Remunjs Olympies Kommitee, biej Groot Kefee L'Union |
| 11.000.000,- | get te drinke veur ‘t Remunjs Olympies Kommitee |
| 29.000.000,- | Totaal oetgegaeve |
Gelökkig zeen alle neudige fasiliteite veur de Olympiese Wintjer Sjpele al in Remunj besjikbaar, zodet veer gein anger kosteposte verwachte! Kiek mer op bladzeij 4!
De noa besjpraekinge oppe Riekswaeg doerde de ganse nacht. Toen oze dirrektäör hiej in de veurmiddaag weer boete kwaam, haje de leje van ‘t IOC allemaol walle ónger de uig. (foto 'de Wallen' in Maasbrach)
Neet alle kedoos veur de leje van ‘t IOC sjtaon op de begreuting. Väöl daovan waas namelik zjwart. Allein de ferrari veur Samaranch neet, det waas netuurelik eine roje! In de ker haet d'r alle anger kedoos ligke. (foto ferrari mit ker)
Wo is waat? De Olympiese fasiliteite
Skiej-sjpringeVeur ‘t sjkiej-sjpringe make veer netuurelik gebroek van de bèste sjpring sjans van heel Europa! Sentraal gelaege in Remunj, mit zat parkeerplaatse veur ederein dae mit de fiets kump. (foto sjans oppe Kloosterwandj)
Ieshokkiej
‘T ieshokkiej haet plaats op ‘t Kloosterwandjplein, omdèt dao de sjpeelhèlfte al appaarte kleure höbbe. Allein mótte alle ieshokkiej-sjpelers waal de sjaatsbesjermers onger de sjaatse hoaje, omdèt anges de marmer tegels besjadigd kinne waere.
Skieje
Veur ‘t skieje make veer allereers gebroek van de Kitskesberg. Door de heugte van de Kitskesberg zeen veer dao zeker van perfekte sjnee, zodet de skiej-aafdaling volges plan kin waere aafgewirk.
Allein mit ‘t sjlalomme zeen veer dao neet zo zeker van. Veer wille netuurelik gebroek make van det gewèldige parkoer van de Donderbergweeg. Dao waerd noe al geoefendj! Doordet veer op de Donderbergwaeg neet zeker zeen van goje sjnee, kinne veer de Kepelderwaeg as alternatief gebroeke. ‘T parkoer is dao gèt minder sjlalom, mer ‘t is waal baeter, sjoonder en duurder verleech!
De sjnee-plenkers (ouch waal snowboarders) sjture veer nao de sjtortbelt in Mofert. Want zónger ‘ne voel-verbranjer is dae sjtortbelt in 2011 ‘ne berg van Olympiese maotsjtaaf. En ‘t sjnee-planke waert dèn netuurelik ‘n echte aafvalrees.
Sjaatse
Veur ‘t sjaatse zal ‘t Munsterplein nuuj waere ingerich. Ouch omdet volges ‘t Zjwetskammezaol van d'n Uul de Munster-kirk waert gesjloop, kump dao rondj om de kiosk zat plaats veur ‘t sjaatse. En omdet ‘t neet ‘t Kloosterwandjplein is, höbbe de sjaatsers gein sjaatsbesjermers neudig. As wethajer Bloemers in 2011 dao die hónjs-weecee nog neet haet gesjloop, den mot d'r gekluund waere. ‘T korte baan sjaatse (sjort trèk) kan netuurelik IN de kiosk. (foto Munsterplein)
Kuns-Sjaatse
‘t kuns-sjaatse haet netuurelik plaats in ‘t Centrum veur de Kunste, omdet de Olympiese Sjpele allein veur neet kommersjeel sjporters is. Veur kommersjeel sjporters haje veer netuurelik de Appelesienerie genaome. Kaarte veur ‘t kuns-sjaatse in ‘t Centrum veur de Kunste zeen noe al te besjtèlle biej ‘t Podium Buro.
Olympiese Dörp
Omdet veer veur de beneudigde verbouwing gein göljes höbbe, kin ‘t Olympies dörp neet op de aaj kezerne. Daorom verblieve de sjporters in oos eige Olympiese drievendje Dörp, Marina Oolderhuuske. Mit al die Pruuse die dao noe al rondj laupe, zeen ze dao ouch al gewindj aan lèstige boetelenjers. En as training óm werm te waere, kinne de sjporters den de maas euver sjwumme of roeie. Veur de bobo's höbbe veer de Blauw Sjuut gehuurd. En in ‘t Olympiese Dörp kinne de sjporters mer leefs 60 daag proof-sjlaope op waterbedde van Jos Becks!
Limburg Hoes
Mit de Olympiese Wintjer Sjpele in Remunj wille veer gein Hollandj Hoes, mer ‘n Limburg Hoes ingerichte. Omdèt veer in ‘t Limburg Hoes waal oos gans natsjenaal Olympies team mit Prins/Keuning Willem-Alexander wille höbbe, kump ‘t Limburg Hoes in kefee Nationaal. Dao kinse perfek aete en drinke oppe Kloosterwandjsjtroat 22 in Remunj!
Olympiese (lóch) waeg
Veer höbbe netuurelik ouch aan ‘t Olympiese reize gedach. Ederein kan in 2011 gebroek make van perfekte waeg nao Remunj. Neet allein de A73 en A68, mer ouch de A2 löp den door Remunj. Veer höbbe alvas geregeldj det ‘n nuuj börger vleegveldj in Brüggen kump en ouch die ekstra Oos-Wès baan biej vleegveldj Baek kriege veer nog waal geregeldj. En zo helpe veer alle bezeukers sjnel nao de Olympiese Wintjer Sjpele in Remunj via de lóch en de waeg! En det ouch de Roer en de Maas kinne waere gebroek sjprik veur zich!
Parkere in Remunj
Omdet ‘t nog neet zeker is dèt ‘t Roersingelprojek in 2011 aaf zal zeen, höbbe veer alvas ‘n kontrak mit Cillekes aafgesjlaote om zat parkeerplaatse te höbbe. En eederein in Remunj waert vergunninghaajer mit de Olympiese Wintjer Sjpele.
't lètste Olympies nuujts
Sorry veur de euverlas!‘T Remunjs Olympies Kommitee haet op zondaag 7 fibberwarie, tiedes de resepsie van oze veurzitter Bacchus Jan 1 ‘t sjnee-kenon oetgeperbeert. Toen veer oppe resepsie nao ós köfferke mit 50.000,- aan sjtaekpenninge aan ‘t zeuke waare, höbbe veer vergaete ‘t sjnee-kenon oet te zitte. Veur al die luuj die las höbbe gehad van de sjnee zegke veer sorry veur de euverlas! Troewes, ós köfferke höbbe veer terök, mer die sjtaekpenninge zeen veer nog altied kwiet. As emes ze inne Bacchusclub (Amstelclub aan ‘t Zwartbrookplein) haet gevonje, bring ze os dan sjnel terök!
Olympiese vlam al in Remunj!
Olympiese Wintjer Sjpele zeen netuurelik nieks zonger Olympiese vlam, zeker omdèt ‘t inne wintjer kaad is. Noe haaje veer de Olympliese vlam aafgeloupe jaor in Nagano alvas opgehaold (zo zeker waere veer van oos zaak). Ein van oos sjponsóre booj toe metein aan om die Olympiese vlam veur os te beware in heure zaal. Omdèt die mit zien twieje waere, ginge veer d'r van oet det det waal good zow gaon. Jaomer, jaomer, ‘t moch neet zo zeen. Oze sjponsor, kefee-zaal de Twee Zusjes in Leeve, höbbe d'r ‘n klein ongelukske mit gehadj. De Olympiese vlam wool effe ‘n Olympies vuur zeen, wonao kefee-zaal de Twee Zusjes noe nog mèr kefee de Twee Zusjes het. Zusjes, ‘t sjpiet os zeer! As pleister oppe wonj, zulle veer uch ere as offisjeele sjponsor van de Olympiese vlam! Troewens, veur die vlam höbbe veer ‘n veiliger plaats gevonje oppe televisietore! (foto vlam)
Hay en Resie sjrieve ‘t offiesjeel Olympiese leed!
‘T Remunjs Olympies Kommitee haet ‘t waereldj bekinde duo Hay en Resie gekontrakteerd om veur de Olympiese Wintjer Sjpele ‘t offiesjeel Olympiese leedje te sjrieve. Dao höbbe ze dus nog zoon 11 jaor veur, zodèt ze heur eige optrejes kinne blieve aafwirke. Sjterker nog, geer kint ze nog booke! Veer verwachte dèt ‘t leedje zo good is dèt ‘t mit gemaak ‘t Limburgs Vasteloaves leedjeskonkoers wintj, daonao gekooze waert as ‘t Nederlandse leedje veur ‘t Eurovisie Songfestival en dus in 2012 ‘t Eurovisie Songfestival in Remunj kin waere gehoaje. Geer sjnapt ‘t: ‘t ROK zal ouch teikene veur de organisasie van ‘t Eurovisie Songfestival in 2012.... Kiek mer in de Optoch volgend jaor!
't ROK op ‘t internet! (jao ech!)
'T Remunjs Olympies Kommitee prissenteert zich ouch op ‘t internet. Dao kint geer alle tekste van ‘t Olympies Journal naolaeze en kieke wie veer verder wirke aan de Remunjse Olympiese Wintjer Sjpele! Netuurelik kint geer dao ouch zeen wèlke leje van ‘t IOC al veur os höbbe gesjtumd. En de sjporters die neet nao Remunj kinne kómme, kinne via Digitaal Remunj op ‘t internet d'r virtueel biej zeen! En det alles meugelik gemaak door Spirit Solutions van de Heilige Geist sjtraot 3 in Remunj.
Vriejwilligers veur de Sjpele door Oetzendburo Olympia geleverd!
Omdet Olympiese Wintjer Sjpele allein mögelik zeen as d'r zat vriejwilligers zeen (betale kinne veer ze neet, veer höbbe gein ruumte meer oppe begreuting), höbbe veer Oetzendburo Olympia óm hulp gevraog. Oet de naam bliek al det die zat ervaring höbbe in lympies wirk. Veer zeen dus zeker van zat vriejwilligers! Troewens, nao de Olympiese Wintjer Sjpele help Oetzendburo Olympia de leje van ‘t Remunjs Olympies Kommitee weer sjnel aan ‘t wirk vanoet de Neersjtraot 30 in Remunj!
Tiedwaarnaeming perfek aafgesjteld
Door oze sjponsor Spirit Computers oet de Heilige Geistsjtraot 3 in Remunj zulle alle computers veur de Olympiese tiedwaarnaeming waere geleverd. De aafsjtelling van die computers zal zo sjerp zeen det alle Remunjse sjporters al geklok waere veurdet ze aan de sjtreep zeen. Sukses verzekerdj en veul Olympiese records in Remunj!
Beugele biej Braam
‘t kin netuurelik zeen det veer geine echte sjnee kriege en ‘t sjnee apperaat kepot geit. Veer höbbe kefee-beugelbaan Braam aan de Meules besjikbaar om mit alle sjporters dao te beugele. De leje van ‘t IOC zeen al bekind mit beugele, omdet die allemaol antieke beugelböl höbbe gekrege, gesjponsort door Braam en oppe begreuting teruk te vinje (bladzeij 3).
La Baraque sjponsort de Olympiese Ringe!
François van oze Ringe sjponsor kefee La Baraque haet es echte Remunjeneer mit ein good Vastelaovend-geveul de kleure van oos Olympiese Ringe bepaold: ze waere Vastelaovend rood-gael-greun en Remunjs blouw. Biej kefee La Baraque oppe Sjuiteberg 4 in Remunj zit ederein good veur ‘t ech Remunjs Vasteloavend geveul.
Olympiese sjponsore
Veer danke oos sukses aan oos sjponsore! Van herte bedank!|
Grafische Service Kloosterwand Grand-kefee L'Union Kefee La Baraque Kefee-restaurant Nationaal Kefee-restaurant ‘t Roerpötje Kefee Tapas Kefee Le Journal Kefee Braam Kefee De Twee Zusjes |
Keffee Amstelclub Kefee de Hanebar Kefee ‘t Gouden Appeltje Olympia Uitzendburo Spirit Solutions - Digitaal Roermond Spirit Computers Jos Becks Waterbedde Safy Products Startravel Reisburo Haele |
't Olympies program
Zondaag 18 fibberwarie 2011 om 11.11 oer: De äöpenings sirremonie De äöpenings sirremonie vind plaats oppe Mert, oftewaal Olympic Plaza. De sjporters zoale allemoal acte de presence gaeve veur ‘t bordès van os sjtadhoes. Dao sjtaon ze waal tösse de geparkeerde wages. De offiesjeele äöpeningshanjeling waert door Burgermeister Jos van Rey oetgeveurd, wo nao ‘t wereldjberoemde duo Hay & Resi samen mit ‘t LSO ‘t äöpenings leedje sjpele.Nao de äöpenings sirremonie gaon veer mit de omgekochte leje van ‘t IOC en mit oos sjponsore get lekkers aete biej Jolinda en Ramses van groot kefee L'Union oppe Mert 21. De meiste leje van ‘t IOC zeen dao troewes al ins mit os gewaes en wolle per sé teruk!
Maondaag 19 fibberwarie 2011 om 11.11 oer: ‘t Sjaatse
Dao nao gaon veer d'r eine drinke biej oze naam-sjponsor le Journal op ‘t Sjtasieplein
Dinsdaag 20 fibberwarie 2011 om 11.11 oer: ‘t Skiej-sjpringe
Dao nao gaon veer d'r eine drinke biej ‘Limburg Hoes' Nationaal oppe Kloosterwandjsjtroat
Goonsdaag 21 fibberwarie 2011 om 11.11 oer: ‘t Ieshokkiej
Dao nao gaon veer d'r eine drinke biej oze Ringe sjponsor la Baraque op de Sjuiteberg
Donderdaag 22 fibberwarie 2011 om 11.11 oer: ‘t Kuns-sjaatse
Dao nao gaon veer d'r eine drinke biej oze Olympiese Vlam-sjponsor ‘de twee zusjes' in Leeve
Friedaag 23 fibberwarie 2011 om 11.11 oer: ‘t Skieje
Dao nao gaon veer d'r eine drinke biej ‘t Roerpötje op ‘t Sjtasieplein
Zaoterdaag 24 fibberwarie 2011 om 11.11 oer: de Medaliej-oetreiking
Omdèt de golje medaliejs waere gesjponsord door ‘in de Golje Appel' gaon veer dao nao d'r eine drinke biej ‘in de Golje Appel' oppe Mert 19
Zondaag 25 fibberwarie 2011 om 11.11 oer: de Sjloetings Sirremonie
Dao nao gaon veer d'r eine drinke biej de Amstelclub aan ‘t Zjwartbrookplein, wo oze veurzitter Bacchus Jan 1 de lètste weurd aan os rich.
Demonsjtrasie Sjporte
Sjtierevechte en Flamengo danseBiej kefee Tapas op ‘t Sjtasieplein 12 zal ‘t Sjtierevechte en ‘t Flamengo danse as demonsjtrasie sjport waere aafgewirk. Veer zeen al mit de Sjpaanse en Mexicaanse IOC leje biej Tapas gewaes. De meziek en ‘t aete beveel zo good det die IOC leje dao nog altied zeen!
Reure in de pot
De nuujtste krach sjport - Reure in de pot - doon veer, wo anges, in ‘t Roerpötje aan ‘t Sjtasieplein 13. En die krachsjporters komme dao netuurelik weer op krachte mit ‘t aete (en drinke) veur fienpreuvers van ‘t Roerpötje! En wao sjleup ROK-lid de Prins van Oranje?!
Anger demonsjtrasie sjporte in 2011:
Munsterplein Wals, Waever danse, Optoch loupe, Vastelaovend viere, veur nieks parkere in Remunj, Hoogwatersjpringe, Dweijele en Aajhore.